عيدميلاد مبارك...احتفال ساخربالشموع فى التحرير

جانب من الاحتفال في التحرير


بالأمس احتفل المصريون على طريقتهم الخاصة بأول عيد ميلاد للرئيس المخلوع مبارك، فى ظل مواجهته هو وأسرته تهم فساد واستغلال نفوذ وكسب غير المشروع، وفى الوقت الذى نظم فيه بعض مؤيدى مبارك مظاهرة تأييد ووفاء له بالقرب من ماسبيرو، تضامنا معه واحتفاءً به فى ذكرى يوم ميلاده، وطالبوا بالإفراج عنه، وبرغم الاشتباكات بين مؤيدى مبارك ومعارضيه من شباب الثورة؛ كان هناك حفل خاص بميدان التحرير نظَّمه العشرات من الناشطين والشباب الشاركين فى الثورة.
وقد تميز الحفل الذى نظم خصيصا من للاحتفال بعيد ميلاد مبارك بقدر كبير من السخرية وخفة الدم، حيث حمل المتظاهرون تورتات افتراضية من الورق الكارتون وغيره من الخامات الطبيعية و أضأوا شموعا وطافوا بها فى الميدان وهم يحملون البالونات ويغنون " يالا حالا بالا حيوا أبو الفساد ..هيكون عيد ميلاده الليلة أسعد الأعياد.. فليحيا أبو الفساد " ولم تخل تلك الاحتفالية الساخرة من هتافات أخرى طالب فيها المشاركين باسترداد أموال مصر المنهوبة والتى تم تهريبها بمعرفة مبارك وعائلته والمقربين منه فتداخلت هتافات مثل " عايزين فلوسنا وفلوس ولادنا .. عايز حقى ..حسنى سرقنى" مع أغانى الحفل.
وانتقلت أجواء هذا الحفل وما يحمله من طابع ساخر إلى موقع التواصل الاجتماعى "تويتر" حيث دشن المصريون احتفالا خاصا بمبارك عددوا فيه الهدايا التى يرغب كل منهم فى منحها لمبارك فى تلك المناسبة وكان من أبرز الهدايا المقترحة:
- حشتريله كلابشات.
- حنجيبله ترينج ابيض لطرة واحد صيفى والتانى شتوى .
- هجبله بوكية مولوتوف هدية.
- نوديه يتعالج فى ليبيا.
- حنركبه عبارة من اللى بيغرقوا دول .
- أحلى تورتة مسرطنة للزعيم .
- السباعى اشترى لفافة جاتوه عشان عيدالميلاد.
- عايزين ندي مبارك هديه بوكيه ورد اللي بيكون فيه الجمره الخبيثه من اللي هما بيموتوا دول.
- هو مش سابنا نتسلى وعملنا له ثورة خلاص هنجيبله كوتشينة وطاولة عشان يتسلى.
- عاوزة ابعت له تورتة بشموع ديناميت.
- تورتة عبارة عن علبة حلاوة كبييييييييييييييرة و احطلك فيها 85 شمعة.
- عايزين نجيب له هدية يا جماعة دوا للارتجاف الأذينى و الميترالى عشان نخلص وننقله طره.
-هجبلك اجندة جديدة تكتب كل اللي انت عاوزو وأفسحك بكرة في كنتاااكي.. عشان ماتؤلش حرمك من أي حاجة.
- أحلى هدية لم شمل الأب الحنون مبارك مع أطفاله الأبرياء علاء وجيمي للاحتفال بمولده المبارك في بورتو طره
- هو ايه طعم مية المجاري مع الخضار المسرطن؟ .. أكيد حاجه نفسي مبارك ياكلها في اليوم ده .
أما بوفيه الحفل فاقترح أحدهم أن يكون البوفيه عيش بالطوب و فاكهة مروية بمياة الصرف الصحى عليها رشة مبيدات مسرطنة و تشكيلة فاخرة من لحوم الحمير واللحوم الهندية المدودة فى إشارة لما كان يعانى منه الشعب المصرى فى عهده من طعام ملوث غير آمن .
وتعددت أغنيات الاحتفال التى رددها المصريون وتصدرت أغنية " يالا حالا بالا هنوا أبو الفساد " القائمة بالإضافة إلى أغنيات وتهانى أخرى ابتكرها المصريون خصيصا من أجل تلك المناسبة منها:
-ياللا حالاً بالاً بالاً حزوا في نفس أبو الفساد .. هيكون عيد ميلاده الليله أسود الأعياد .. فليسقط أبو الفساد.
- في عيدي إيه ع البال... خيبتي ع البخت اللي مال.. مفيش غيرك ياجمال
- غنوا حلال بالا غنوا لأبو علاء هو ومراته وولاده أسعد السجناء .. متغنوا لأبو علاء
- سنة حلوة يا حرامى ..سنة حلوة يا سارقنا .. سنة حلوة يا كداب ..هنوريك أيام هباب .
هذا وقد تنوعت أيضا أمنيات وتهانى المصريين لمبارك بمناسبة عيد ميلاده وكان أبرزها :
- - عقبال ميييييييييييييييييييييييييييييت سنة ....عايزين عقاب الأرض يوصل قبل عقاب السماء.
- كل سنة و انت طيب يا كبير. و علي السنه الجايه تكون صحتك اتحسنت و تتجمع تاني مع حبيبك في المزرعه كده.بدعيلك من معاميق قلبي والله.
- يحز في نفسى انك تقضى عيد ميلادك بعيد عن اطفالك الحلويين ..علاء وجمال..يالا يا راجل شد حيلك علشان تروحلهم طره بقى.
- - مبارك للي شالك ..و عقبال ما يسجن عيالك ..يا ظالم كان ليه و مالك.. اهو شعبك زهق و جالك.. و نفعت في ايه أموالك يا هالك.
- مرت سنة بكل ما فيها و جت سنة أحلى ما فيها إنك إنشاء الله هتتعدم فيها.
- - يارب كل ليلة تحلم بكل اللى جالهم سرطان فى عهدك من ورا المبيدات المسرطنة والخضار المروى بمية المجارى وتحلم بشهداء العبارة وهم بيغرقوا فى عرض البحر وشهداء الثورة كمان واحد واحد .
- كل سنة وانت طيب وعقبال مليون سنة فى السجن .
- كل سنة وانت زي ما انت.. سجين.. مريض.. ضعيف.. مكروه ومحتقر
- كل عام وأنت مسجون، كل عام وأنت مخلوع، كل عام وأنت باكي على ذنوبك، وكل عام وأنت خائف من انتقام ربك حتى تلقاه
- عقبال 100 سنة يا خويا بدعيلك بس عشان يا دوبك تلحق تتحاكم في الـ100 سنة
- اطلب واتمنى ياحبيبي ها ناخد فلوسنا منك ونسجنك ولا ناخد فلوسنا ونعدمك
- عقبالك يوم ميلادك لما تقعد جنب عيااااالك....فى طره..يا حسنى ...عقبالك يا حسنى
- ايه ده يوم ميلادك نحس السنة دى ضرب نار فى العتبة وشبرا وماسبيرو ربنا يعدى اليوم ده على خير ..حتى فى سجنك قرفنا بالبلطجية بتوعك
- يا ترى مبارك المخلوع يحب يقول ايه لمبارك الرئيس السابق فى عيد ميلاده ؟
- وصيتك أمانة عليك يا شيخ تاخد بالك من صحتك عايزينك سليم عشان المحاكمة وانت عارف بقى القانون
- - أكيد لو سألناه نفسك فى أيه.هيقول أنا معنديش حاجة عايز أحققها قتل و قتلت نصب ونصبت عندى بدل المليون 80 ..عيالى الاتنين فى السجن.
- كل سنة وانت طيب يازعيم وحشتنا حكمة سيادتك وتعليمات سيادتك
- في يوم ميلادك يا رب تستغل الفرصة ديه وتوب عن كل اللي عملته وترجع كل الفلوس وتشهد في المحكمة علي كل الحرامية وتقابل ربنا تايب .
ان شاء الله هيجيلك 80 مليون في الحلم ويقولك : كل سنه وانت طيب يا مخلوووووووع
- كل سنة وانت مخلوع .
- سعيدة يا أبو بدلة سجن جديدة .
- والله كان نفسى تقضي عيد ميلادك في مكان يليق بيك ...اكيد طره..بس يالا تتعوض السنه الجايه ان شاء الله
- نجيلك إن شاء الله السنة الجاية زى انهاردة فى طرة بتورتة حلاوة.
- عمر سليمان: الشعب المصرى غير مهيىء للاحتفال بعيد ميلاد الريس
- احنا آسفين يا ريس مش هنحتفل بعيد ميلادك السنة دى عشان بنصلح فى البلد مش فاضيين .
- من الشعب إلى الرئيس المخلوع: لا تأكل التورتة يوم عيد ميلادك ٤ مايو .. التورتة بها رصاص مطاطي
- اشوف فيك يوم ..على اللى انت عملته فينا..لما انت غدرت بينا ..واللى رضيته علينا بكره حنرضاه عليك
- السنة الجاية تحتفل بيه مسجون
- يارب يكون بيحز فى نفسك مانفعله بك كما فعلت بنا ..أيوا احنا .
-إسرائيل تهنئ مبارك بعيد ميلاده و بتقوله شالوم عليك يا مبارك يا حبيبي والله انت قطعت بينا قوي قاعدين فى الضلمة من قلة الكهربا والغاز من بعدك.
كما علق عدد كبير من المشاركين فى الحفل الافتراضي على خطة التليفزيون للاحتفال بهذا اليوم مقارنة بما كان عليه الحال فى الأعوام السابقة وكان من أمثلة تلك التعليقات :
- كل سنة فى عيد ميلاد مبارك كانو بيعرضوا على القنوات المصرية فيلم "عنترة بن شداد" و"صلاح الدين الأيوبى" السنة دى هيعرضوا فيلم إيه؟ ...أكيد "العار" .
- اكيد التليفزيون السنة دى هيزيع فيلم "العار" مش "الناصر صلاح الدين"
- ياااااااااااه ... التليفزيون جايب أغاني وأفلام وحاجات عادية مش زي كل سنة مبارك وسط الحقول ويقبل الطفلة والفلاح ويشرب الشاي

موضوع أكثر من رائع نحو الافضل